Juvver steekinmond

Pagina afdrukken twitter Hyves

hier woont juvver steekinmond
hail allaine mit heur hond
ale doage slikt ze slik
uut n puutje en uut blik
eerst was zai n dunnechie
nou is zai n tunnechie

sukkeloa en veterdrop
pinda's mit en zunder dop
dat et juvver steekinmond
en dat vret heur laive hond
eerst was hai n dunnechie
nou is hai n tunnechie

doempiezoegen baaltjes slikken
toartjes aan n vörkie prikken
dat dut juvver steekinmond
en dat dut heur laive hond
alebaaide dunnechies
alebaaide tunnechies

ronde juvver steekinmond
zingt n laidje mit heur hond
mit heur twijdent op gromaark
onder bomen in stadspaark
steekinmond mit slik op schoot
hond mit metworst in zien poot
alebaaide tunnechies
mor
alebaaide zunnechies

Auteur: Gré van der Veen
Uit: De Syberische Kou (1990)