Van n grasgruine kikker, vief vedde roepen, de wereld mieghummels en honderd stainmotten

Pagina afdrukken twitter Hyves

n grasgruine kikker zit in zien zundags klaid

op n stain uut te rusten, woarvan wait hai nait

hai ropt: dizze stain dij paast persies bie mie

de mainste daaier lopen der stief aan veurbie

 

vief vedde roepen en de wereld mieghummels

binnen aal mit mekoar dikke, dikke lummels

ze doun aingoal dingen dij echt nait maggen

en ze mouten der zulf hail haard om lachen

 

hé kikker, roupen z’in koor, wat dust doe doar

vot, dij mooie stain is van ons, eerlieks woar

mor de grasgruine kikker dij lacht zok slap:

ik poest joe vot of k sloek joe op in ain hap

 

onder dij mooie stain wonen sunds joar en dag

honderd stainmotten en dij kroepen der op slag

onder vandoan en heuren din ain, twij en drij

o, gek, dij al-der-vre-zelkst male kif-ke-de-rij

 

de kikker, de mieghummels en de roepen

mouten aal noar dij radde pootjes gloepen

de stainmotten stoan doar in n mum van tied

as kriegers op n rieg en roupen: arree, uut zied

 

dizze stain is al joarenlaank deur ons bezet

om kibbelsnoeten hebben we echt gain verlet

geroup en gereer op en om ons aigen bezit

dat verdroagen wie nait en zeker gain gevit

 

de mieghummels bozzeln vot zo rad ze kinnen

dij wizzen votdoadelk wat schiers te verzinnen:

bie bakker Stoetje is suker hail zuit en gezond

doar kroepen wie in en eten ons de liefies rond

 

mörgen begunnen wie vannijs ons rond te eten

en ons keunegin maggen we beslist nait vergeten

ze woont daip onder de grond bie de daarde tegel

hail laif en hail mooi en hail jonk en hail kregel

 

de kikker ropt: aan vree ligt mie veul gelegen

aju, ik nok hom, hier schaaiden zok ons wegen

k vin wis en vrachteg n prachteg woaterlelieblad

doar goa ik op zitten, plat op mien kikkergat

 

mor in gain geval zit ik doar triest te sikkeneuren

t volgende staait noar mien mainen te gebeuren:

ik zuik mie n laif vraauwtje uut n haile vracht

en zörg din veur n wonderschoon noageslacht

 

de vedde roepen mouten eerst wat opbedinken

dus goan ze laank en stief aan t prakkedinken

din waiten ze t: wie zuiken ons n brannekkel op

doar kroepen wie onder en hangen din op de kop

 

zo krigt n male vogel ons vervast nooit te pakken

en kinnen wie op ons dooie gemak dikkedakken

gainain duurft ja op n brannekkel zitten te goan

ons huusvestensprobleem is dus ook van de boan

 

 

de grasgruine kikker

en de vief vedde roepen

de wereld mieghummels

en de honderd stainmotten…

hebben nou aalmoal heur aigen stee

en wonen doar gelukkeg en tevree

 

 

Gré van der Veen